प्रवासी साझा मञ्चको नेतृत्वमा कुल्लु दशहरामा नेपालको सांस्कृतिक पहिचान प्रस्तुत
कुमार रोका।
कुल्लु भारत अक्टोबर २४। भारतको हिमाचल प्रदेशमा आयोजित अन्तर्राष्ट्रिय कुल्लु दशहरा महोत्सवमा नेपाली मौलिक कला संस्कृति र जातीय विविधता झल्किने सांस्कृतिक झाँकी प्रस्तुत गरिएको छ। प्रवासी साझा मञ्च हिमाचल प्रदेश राज्य समितिको नेतृत्वमा सहभागी सिन्धुली कला घरले ११ जातजातिका परम्परागत भेषभूषा र नौमती पञ्चेबाजासहित नेपालको सांस्कृतिक पहिचानलाई अन्तर्राष्ट्रिय मञ्चमा प्रस्तुत गरेको हो।
अक्टोबर २४ मा आयोजित अन्तर्राष्ट्रिय सांस्कृतिक झाँकी प्रदर्शनमा नेपाली कलाकारहरू विभिन्न जातजातिका मौलिक पहिरनमा सजिएर सहभागी भएका थिए। परम्परागत भेषभूषा नौमती पञ्चेबाजा र नेपाली सांस्कृतिक परम्पराको संयोजनले नेपालको बहुजातीय तथा बहुसांस्कृतिक स्वरूपलाई उजागर गरेको थियो।
महोत्सवमा १७ भन्दा बढी देशका सांस्कृतिक टोली सहभागी भएका थिए। विभिन्न देशका कलाकारहरूले आ आफ्नो राष्ट्रको मौलिक कला संस्कृति परम्परा र पहिचान झल्किने प्रस्तुति दिएका थिए। यही अन्तर्राष्ट्रिय सांस्कृतिक जमघटमा नेपाली टोलीले विविधताभित्रको एकता र सांस्कृतिक सहअस्तित्वको सन्देश प्रवाह गरेको थियो।
प्रवासी साझा मञ्च हिमाचल प्रदेश राज्य समितिको नेतृत्वमा सिन्धुली कला घरले दिएको प्रस्तुतिले नेपाली मौलिक संस्कृतिको संरक्षण प्रवर्द्धन र अन्तर्राष्ट्रिय प्रचारप्रसारमा महत्त्वपूर्ण योगदान पुर्याएको छ। विशेषगरी ११ जातजातिको भेषभूषालाई एउटै झाँकीमा समेटिनुले नेपालको जातीय विविधता सांस्कृतिक समृद्धि र साझा राष्ट्रिय पहिचानलाई प्रतिबिम्बित गरेको थियो।
अन्तर्राष्ट्रिय कुल्लु दशहरा विभिन्न देशका कला संस्कृति र परम्परालाई एउटै मञ्चमा प्रस्तुत गर्ने महत्त्वपूर्ण उत्सवका रूपमा परिचित छ। यस महोत्सवमा नेपालको सहभागिताले नेपाली संस्कृति विश्वसमुदायमाझ चिनाउने अवसर प्रदान गर्नुका साथै विदेशमा रहेका नेपाली समुदायमा आफ्नो भाषा कला संस्कृति र पहिचानप्रतिको अपनत्व अभिवृद्धि गर्नसमेत सहयोग पुग्ने अपेक्षा गरिएको छ।
प्रवासी साझा मञ्चको नेतृत्वमा सिन्धुली कला घरले प्रस्तुत गरेको सांस्कृतिक झाँकीले नेपालको मौलिकता जातीय विविधता र सांस्कृतिक गौरवलाई अन्तर्राष्ट्रिय मञ्चमा उजागर गरेको छ। यसले नेपालको सांस्कृतिक पहिचानलाई सीमाभन्दा बाहिर पुर्याउँदै नेपाली कला र परम्पराको प्रवर्द्धनमा थप टेवा पुर्याएको छ।